पोलिस आणि राजकीय दबावाला कंटाळून फलटण उपजिल्हा रुग्णालयातील महिला वैद्यकीय अधिकाऱ्याने आत्महत्या केल्याची संतापजनक घटना घडली आहे. मूळची बीड जिल्ह्यातील असलेली ही तरुण डॉक्टर फलटणमधील एका नामांकित हॉटेलमध्ये गळफास घेऊन मृतावस्थेत आढळली.
गेल्या पाच महिन्यांपासून तिचा छळ सुरू होता. वारंवार तक्रार करूनही कोणी दखल घेतली नाही. जून महिन्यापासून सुरू असलेल्या या प्रकरणाचा संपूर्ण घटनाक्रम आता समोर आला आहे.
आत्तापर्यंत काय घडलं?
१९ जून २०२५:
डॉक्टर तरुणीने फलटणचे उपविभागीय पोलिस अधिकारी (DySP) यांच्याकडे पोलीस उपनिरीक्षक (PSI) गोपाळ बादणे आणि इतर अधिकाऱ्यांकडून होणाऱ्या सततच्या छळवणुकी आणि लैंगिक अत्याचाराबाबत लेखी तक्रार दाखल केली होती.
मात्र या तक्रारीवर कोणतीही ठोस कारवाई झाली नाही. ही मोठी प्रशासकीय त्रुटी असून सध्या त्यावर चौकशी सुरू आहे.
जून – ऑक्टोबर २०२५:
या काळात डॉक्टरवर सतत दबाव टाकण्यात आला.
फलटण ग्रामीण पोलिसांकडून त्यांच्या विरोधात “वैद्यकीय तपासात अडथळा आणला” असा आरोप करत विभागीय चौकशी सुरू करण्यात आली.
पोलिस आणि आरोग्य विभागातील शवविच्छेदन प्रकरणांवरील मतभेदांमुळे त्यांच्यावर अतिरिक्त ताण निर्माण झाला.
वरिष्ठ अधिकाऱ्यांना पाठवलेल्या पत्रांमध्ये त्यांनी मानसिक छळ, नैराश्य आणि आत्महत्येच्या विचारांबद्दल इशारा दिला होता.
२३ ऑक्टोबर २०२५:
भाऊबीजेच्या रात्री सुमारे १०:३० वाजता डॉक्टर तरुणी या फलटणमधील त्यांच्या हॉटेल रूममध्ये गळफास घेतलेल्या अवस्थेत मृत आढळल्या.
रुग्णालयीन ड्युटीनंतर त्या नेहमी हॉटेलमध्येच राहत असत.
त्यांच्या हाताच्या तळव्यावर लिहिलेल्या आत्महत्येच्या चिठ्ठीत PSI गोपाळ बादणे (लैंगिक आणि मानसिक छळाचे आरोप) आणि प्रशांत बंकर (मानसिक छळाचा आरोप) यांची नावे होती.
या चिठ्ठीतील मजकूर आणि घटनांची पार्श्वभूमी पाहता, सततच्या छळामुळेच त्यांनी आत्महत्या केल्याचे स्पष्ट दिसते.
२३–२४ ऑक्टोबर २०२५:
कुटुंबीय आणि सहकारी डॉक्टरांचा आरोप आहे की, संवेदनशील शवविच्छेदन प्रकरणांमध्ये दस्तऐवज बदलण्याचा दबाव त्यांच्यावर आणला जात होता.
यामुळे त्यांची मानसिक अवस्था अधिकच खालावली होती.
२४ ऑक्टोबर २०२५:
सातारा पोलिसांनी PSI गोपाळ बादणे (बलात्कार, आत्महत्येस प्रवृत्त करणे) आणि प्रशांत बंकर यांच्या विरोधात गुन्हा नोंदवला.
उपमुख्यमंत्री देवेंद्र फडणवीस यांच्या आदेशानुसार PSI बादणे यांना तात्काळ निलंबित करण्यात आले आणि सखोल चौकशीचे निर्देश देण्यात आले.
२४–२५ ऑक्टोबर २०२५:
या प्रकरणात आरोपी प्रशांत बंकर यास अटक करण्यात आली असून मुख्य आरोपी गोपाळ बादणे अद्याप फरार आहे.
त्याच्या शोधासाठी विशेष पथके रवाना करण्यात आली आहेत.
मृतदेहाचे शवविच्छेदन करून तो बीडला पाठवण्यात आला असून आत्महत्येच्या चिठ्ठीचे फॉरेन्सिक परीक्षण सुरू आहे.
महाराष्ट्र राज्य महिला आयोगाने या प्रकरणातील निष्क्रियतेबाबत चौकशी आणि जबाबदारी निश्चित करण्याची मागणी केली आहे.
खासदार कोण?
या प्रकरणात एका खासदारांसह त्यांच्या दोन पीएंनी फोनवरून संवाद साधल्याचा गंभीर आरोप डॉक्टर तरुणीने केला आहे.
त्यांनी खासदाराचे नाव लिहिले नसल्याने हा विद्यमान की माजी खासदार? असा प्रश्न उपस्थित झाला आहे.
ठाकरे गटाचे नेते अंबादास दानवे यांनी या प्रकरणात भाजप नेते आणि माजी खासदार रणजितसिंह निंबाळकर यांचे नाव घेतले आहे.
त्यांचे पीए राजेंद्र शिंदे आणि नागटिळक यांचा या प्रकरणात सहभाग असल्याचा थेट आरोप केला गेला आहे.